fæ "hland fyrir hjartað" fyrir hverja verslunarferð...

Mín karfa hefur allavega hækkað umtalsvert.  Sé fram á að fara að skera niður ýmsar "munaðarvörur" sem hingað til hafa leynst í skápunum.  Tökum sem dæmi Weetos, ef minnið mitt er ekki farið að bresta þá var það verðlagt 659 kr. í síðustu bónusferð.  Nú býð ég börnunum mínum upp á súrmjólk á morgnana, verst að þeim finnst hafragrautur ekki góður !!!

Matarverð hefur hækkað um 25%

hvers vegna eru prófarkalesarar ekki í vinnu á netfjölmiðlum

"Húsið í happdrættisvommomg"

Ég er daglega að sjá villur bæði stafsetningavillur og málvillur hér á mbl.is og svo ekki sé minnst á visir.is.

Húsið í happdrættisvinning

Minningarkort..

Þetta verkefni gerði ég í Eigindlegum rannsóknaraðferðum fyrr í vetur í Háskólanum.  Við áttum að skrifa minningarkort og teikna mynd um einhverja minningu sem við eigum.  Ég fékk 10 í einkun fyrir þetta verkefni og frábæra umsögn og var mjög sátt !!

 

Reykjavík 1979.

Vesturbærinn í Reykjavík árið 1979. Það er haust, laufin eru að falla af trjánum og skólinn er nýbyrjaður. Ég var að byrja í 6 ára bekk í Vesturbæjarskóla, nýkomin heim úr Bárðardalnum þar sem ég eyddi sumrinu, brún og útitekin, mamma segir að ég hafi stækkað heilmikið um sumarið.

Pabbi er að búa sig undir að fara í vinnuna, hann klæðir sig í betri fötin og setur á sig Old Spice. Eins og svo oft áður á ég að fara með honum í vinnuna, mamma vann á Kleppspítalanum og var mikið á kvöldvöktum og þá fór ég með pabba í vinnuna.

Við leiðumst niður tröppurnar á húsinu okkar í Ránargötu númer 33 og svo röltum við af stað niður Ránargötuna, húsin standa þétt að hvert öðru, stór tré, krakkar í leik, skrýtin matarlykt berst til okkar frá eldhúsgluggum. Við syngjum “My Bonnie is over the ocean, my Bonnie is over the sea” , tökum nokkur valhopp og pössum okkur á því að stíga ekki á strik.

Hann kann svo mörg lög, hann var í frægum hljómsveitum í mörg ár áður en ég fæddist, eins og Lúdó sextett og Stefán, City sextett, hann spilaði með frægum söngkonum eins og Ellý Vilhjálms og Erlu Þorsteins.

Á Lækjartorgi kaupum við okkur pylsu, ég vil pylsu bara með tómatsósu, uppi og niðri. Frá Lækjartorgi er stefnan tekin upp Hverfisgötuna þar sem Þjóðleikhúsið stendur, þar vinnur pabbi. Þetta stóra gráa hús ber yfir sér mikinn sjarma og mér finnst það vera stærsta hús í heimi.

Við förum ekki upp stóru tröppurnar upp um aðalinnganginn, heldur förum við niður í Þjóðleikhússkjallarann, göngum niður lítinn brattan stiga og endum í eldhúsinu. Þar er mikið um að vera, kokkar og þjónar á fullu og í litlu herbergi inn af eldhúsinu sitja leikararnir Árni Tryggvason, Bessi Bjarnason, Sigríður Þorvaldsdóttir, Erlingur Gíslason og fleiri. Mig minnir að það hafi verið að sýna leikverkið Stundarfriður eftir Guðmund Steinsson, undir leikstjórn Stefáns Baldurssonar leikhússtjóra. Hann Stefán gaf mér alltaf kanel tyggjó þegar við mættumst á göngunum. Mér fannst það ekkert sérstaklega gott, en það var svo góð lykt af því.

Pabbi sest við svarta gljándi flygilinn í matsalnum, ég sest við hliðina á honum og hann byrjar að spila. Hann er tónlistarmaður og spilar fyrir matargesti Þjóðleikhússins. Ég sit alveg kyrr og passa mig að tala ekkert við hann. Ég nýt þess að hlusta á tónlistina og stundum get ég ekki staðist það að syngja aðeins með. Þá brosir pabbi til mín og spilar aðeins hærra svo ég trufli nú ekki borðhaldið hjá prúðbúna fólkinu.

Konurnar eru í fallegum kjólum og karlmennirnir í jakkafötum með bindi eða slaufu. Ég fer og næ í kaffi handa pabba, svart kaffi í stórri könnu með mörgum skeiðum af sykri út í . Ég sest inn í litla herbergið innan af eldhúsinu og leikararnir fara að spjalla við mig og ég borða besta ís í heimi.

Oft sit ég undir píanóinu og nýt þess að hlusta á tónlistina. Lög eins og Litla flugan, Anna í Hlíð, Ljúfa Anna, Við gengum tvö og Hvítir mávar hljóma inn á milli þekktra og vinsælla laga með Ellu Fitzgerald, Nat King Cole, Louis Armstrong og Oscars Petersons og fleiri snillinga.

Þegar ég sit undir píanóinu finnst mér tónlistin verða allt öðruvísi, hún hljómar ekki eins og ég finn hvern einasta takt, hvern einasta tón og hljóm í hjartanu mínu. Tónlistin fyllir mig gleði og það er eins og pabbi sé að spila bara fyrir mig. Mér líður vel og ég held að ég sé hamingjusamasta 6 ára stelpan á landinu. Allt pabba að þakka, hann spilar svo fallega á píanóið, hann er besti pabbinn í öllum heiminum og ég elska hann svo mikið.

Mér finnst tíminn fljótur að líða og nú er pabbi búin að spila og matargestirnir fara í leikhúsið á efri hæðinni. Við förum inn í eldhús og hann fær sér meira kaffi en ég bryð ísklaka sem ég fæ út stórri kistu, fullri af ísmolum. Svo leiðumst við heim á leið, við syngjum og valhoppum og pössum okkur að stíga ekki á strik.

Dalvík 2005

 

Það er enn og aftur komið haust og laufin farin að falla af trjánum, haustlitirnir eru svo fallegir. Ég er að gefa litla drengnum mínum honum Sigurði Tuma að borða. Hann heitir Sigurður í höfuðið á pabba mínum, besta pabba í heimi.

Litli drengurinn minn er búin að vera veikur, hann er mjög oft veikur þessi litli snáði. Hann fæddist 6 vikum fyrir tímann og var vart hugað líf. En hann spjaraði sig litli kúturinn, augasteinninn hans afa síns.

Ég er að bíða eftir að elsta dóttir mín komi heim úr skólanum til að hún geti náð í yngri systir sína í leikskólann fyrir mig.

Hugurinn reikar upp á sjúkrahús til pabba sem er í aðgerð. Ég er nýbúin að tala við mömmu í símann en hún hafði ekkert frétt, þegar síminn minn hringir, það er læknirinn. “ Sif mín, við getum ekkert gert meira fyrir hann pabba þinn, æxlið hefur stækkað svo mikið, það er orðið svo stórt að það er komið á stærð við mannshöfuð. Mér þykir það leitt, en hann er að deyja, við gefum honum í mesta lagi 3 vikur”.

Ég frýs, ég get ekki einu sinni grátið, ég bara titra og 1000 hugsanir og spurningar fljúga í gegnum huga minn; Hvernig á ég að komast í gegnum þetta, hvernig á ég að komast í gegnum lífið ef pabbi er ekki við hlið mér, kletturinn í mínu lífi, stoð mín og stytta. Ekki pabbi minn, ekki pabbi minn, hvað er Guð eiginlega að hugsa ?.  Hvað verður um mömmu ?, Afhverju er lífið svona ósanngjarnt ?.

Tilfinningin er reiði, ég er reið við læknana, ég er reið við Guð og ég er reið við pabba, hann skal ekki voga sér að deyja frá mér. Ég titra á meðan ég keyri inn á Akureyri. Ég held að ég hugsi ekki einu sinni, ég er bara tilfinningalega frosin.

Ég geng inn á gjörgæsluna og á stofu númer 2, stofuna þar sem hann liggur, elsku besti pabbi minn, en ég græt ekki, ég er reið. Hann spyr mig hvort ég hafi fengið símhringinu frá lækninum. Ég jánka því, þá segir hann við mig; "Fyrigefðu mér elsku Sif mín, þú verður að vera sterk, þú verður að vera sterk fyrir mömmu þína og systir þína, ég veit að þú getur það”.

Í 10 daga vaki ég og sef á sjúkrahúsinu hjá honum, þetta eru erfiðir 10 dagar því hann þjáist mjög mikið. Hvíldina fær hann loksins þegar ég hvísla að honum; “Þetta er allt í lagi pabbi minn, þú mátt deyja, ég spjara mig ég lofa því, ég er ekki lengur reið”.

Hann tekur síðasta andardráttinn og tárin fara að renna hjá mér og mér finnst eins og hjartað mitt tæmist þarna í fyrsta skiptið sem ég græt, eftir að ég fékk þetta örlagaríka símtal.

En ég er ekki lengur reið. 

Skrifað í minningu föður míns Sigurðar Þóris Þórarinssonar, hljóðfæraleikara og vaktmanns í 17 ár á geðdeild FSA.   Fæddur 16. janúar 1944, en lést á FSA þann 27. september 2005. Minning þín lifir í hjarta mínu.

Stór hluti af mér, fór með þér.

Þetta finnst mér alltaf jafn ferlega fyndið... aulahúmor.is

Draugadrjóli : Þú finnur hann koma út en það er enginn kúkur í klóinu þegar þú kíkir.

Hreinn skítur : Sá sem þú skítur og sérð í skálinni en það er ekkert á skeinipappírnum.

Eltikúkur : Þegar þú ert búin að kúka og búin að girða hálfa leið upp um þig og fattar að þú þarft að kúka meira.

Sprengir æð í enninu hnulli : Sá sem þú þarft að hafa svo mikið fyrir að koma frá þér að þú færð næstum slag .

Dauðadrumbur : Svo ógeðslega stór að þú þorir ekki að sturta án þess að búta hann í sundur með blýanti.

Loftpressukúkur : Kemur með svo miklum látum að allir í kallfæri flissa.

Þynnkuskita : Kemur eftir fyllerí. Helsta einkenni hans eru bremsuförin í skálinni.

Maískúkur : Skýrir sig sjálfur.

Ohh-ég-vildi-að-ég-gæti-kúkað kúkur : Þú þarft að kúka en situr bara á dollunni og fretar.

Mænustunguskítur : Þessi er svo brjálæðislega sársaukafullur að þú ert viss um að hann er á leiðinni út þversum.

Rasskinnableytuþrumari (Orkuþrumari): Fer út á svo miklum hraða að afturendinn á þér rennbleytist af klósettvatni.

Fljótandi drulla : Gulbrúnn vökvi frussast út um alla skál og rassgatið á þér með.

Háklassakúkur : Kúkur sem lyktar ekki.

Óvæntur kúkur : Þú ert ekki einu sinni á klóinu því þú hélst að þú þyrftir bara að prumpa en... úps, sparð.

Slórskítur : Kúkurinn losnar ekki frá rassgatinu á þér þó þú sért búin að kúka fyrr en þú hristir þig vel.

Atómsprengja : Þig svíður undan þessum á leiðinni út og svíður enn í marga klukkutíma á eftir.

Skopparakúkur : Hörð spörð sem fara eins og skopparaboltar um alla skálina (kostur þarf lítið að skeina)

Mikilmennskukúkur : þú rembist og rembist og svo kemur eitt pínulítið lambasparð.

Íþróttaálfurinn : kemur ca. klukkutíma eftir leikfimina.

Klippikúkur : sem er svo langur að þú þarft að kúka - klippa - kúka - klippa...

Versnandi... hmmm

hmmm... mér sýnist veðrið vera að skána.... 

Veður fer versnandi

græðgi.... þú segir það Kristján !!

Ef einhver er gráðugur þá er það Kristján Þór Júlíusson.... hann þáði biðlaun frá Akureyrarbæ eftir að hann hætti sem bæjarstjóri... biðlaun þrátt fyrir að vera komin með annað starf hjá bænum sem forseti bæjarstjórnar !!!! 

ÞAÐ KALLA ÉG GRÆÐGI !!!!

Þurfum nýtt sverð

Ég veit það ekki...

....en það gæti verið að ég þyrfti að fara að sætta mig við það að ég sé komin af allra léttasta skeiðinu.  Það þyrmdi yfir mig áðan... þegar Brynja mín kom rjúkandi inn um útidyrahurðina og sagði "ég er orðin 15 ára mamma" 

15 ára... mér finnst það alveg með ólíkindum... ég er sjálf nýbúin að vera 15 ára...  Nei svona í alvörunni... mér finnst vera svo rosalega stutt síðan ég var í bænum með Sunnu vinkonu og við ákváðum að fara í sjógöllum af því að það var svo leiðinlegt veður.... stutt síðan ég var á Hrafnagili... stutt síðan mamma skutlaði okkur vinkonunum á útihátið í Húnaveri (eða ég var rétt orðin 16 þá) stutt síðan Harpa Ýr dóttir hennar Svövu fæddist (hún er by the way orðin 20 stúlkan) .. stutt síðan við systurnar rifumst og slógumst í Hafnarstrætinu.. stutt síðan ég eignaðist fyrsta alvöru kærastann hehe.... stutt síðan Lúther bróðir átti rauða BMWinn og leyfði litlu systir sinni að prófa (ég var reyndar stundum látin keyra hann heim þegar Lúlther var dottinn í það, grínlaust 15 eða 16 ára) ... stutt síðan Svava keyrði á leikhúsið á skellinöðrunni hans Lúthers (það var snilld).... stutt síðan það var í tísku að eiga Millet dúnúlpu og hafa sokkana utanyfir buxurnar !!!!!!

Ég á stelpu sem er í ungmennaráði Akureyrarbæjar... situr á ráðstefnum á KEA...sumir af vinum hennar eru komnir með bílpróf... skammast sín fyrir mömmu sína stundum... er farin á spá í hvaða framhaldskóla hún ætlar í...   og á kærasta... (segir það nokkuð um aldurinn minn)

Til hamingju með daginn elsku Brynja mín... segi bara aftur eins og Bubbi Morthens....

Brynja ég elska þig !!!!!!

 

Hetja hversdagsins í viðtali !!

Tók viðtal fyrir landpóstinn við hana Möggu... endilega kíkið á það

 

www.landpostur.is/news/kerfid_brast_henni./

Stolt mamma !!

Ég er stolt móðir... ég er mjög stolt af öllum börnunum mínum en það er  Brynja (14 að verða 15 ára) sem hefur átt hug minn síðustu daga... hér gengur heimilislífið á með skini og skúrum... 

Hún fékk símtal í síðustu viku þar sem hún var beðin um að sitja í ungmennaráði Akureyrarbæjar, Brynja mín  var eini unglingurinn valin úr öllum 8 til 10 bekkingum í Oddeyrarskóla, Brekkuskóla og Lundarskóla til að sitja í þessi bæjarráði.  Ef þetta fær ekki móðurhjartað til að taka aukaslag af monti !!!  Hún er sem sagt komin í bæjarráð hjá Akureyrarbæ aðeins 14 ára gömul og kemur því til með að hafa áhrif á störf bæjarins sem við kemur unglingunum okkar..  og ekki nóg með það að stelpan sé klár þá er hún líka gullfalleg... var líka valin prinsessa 9 bekkjar um daginn... 

Hún tekur flestu með ró og skynsemi... t.d. hefur fullorðin kona sem tengist henni verið að gera henni lífið leitt... og Brynja tekur því á mjög skynsaman hátt... segir að viðkomandi kona sé greinilega sjúk, en að sjálfsögðu líður henni ílla yfir þessu öllu saman.  Þessi leiðindi hafa gengið ansi langt og leitaði ég aðstoðar í dag og fæ vonandi hjálp til að þessu ljúki. Þeir aðilar sem ég talaði við í dag voru gjörsamlega gáttaðir á því hvernig fullorðið fólk geti hagað sér og látið vanlíðan sína bitna á 14 ára gömlu barni !!!

En það þarf miklu miklu meira en sjúka konu út í bæ til að fella okkur... við höldum göngu okkar bara áfram... og hún liggur upp á við hjá okkur..... þrátt fyrir smá úrkomu !!!

 

Tannlæknar og klippikonur !!

Ég fór með Eyrúnu til tannlæknis í síðustu viku ...sem er ekki frásögu færandi og borgaði rúmlega 7000 krónur fyrir skoðun, myndir, hreinsun og flúor.  Ég er kannski frekar skrítin en mér finnst það ekki mikill peningur svona miðað við margt annað. 

Hvað er maður að borga fyrir klippingu og strípur 13.000... er það ekki svona normal verð í dag fyrir að setjast í stólinn á hárgreiðslustofu nú til dags.  Ég fór með krakkana í klippingu líka í síðustu viku (já ég veit... ég er svooo dugleg) og fyrir Eyrúnu borgaði ég 2500 krónur og 2000 kr. fyrir Sigga litla.  Að vísu finnst mér að ég hefði átt að borga meira fyrir hann, þar sem klippikonan okkar þarf virkilega að hafa mikið fyrir honum í stólnum... hún hefur einstaka þolinmæði og lætur eitt og annað yfir sig ganga á meðan hún klippir hann t.d. leyfir honum að spreyja vatni yfir sig alla... það er allt gert til að halda honum góðum.  Annars er þetta í fyrsta skiptið sem ég fer með hann í klippingu og þarf ekki að halda honum niðri á meðan hún rýjar hann :=)

Á morgun á hann svo tíma hjá tannlækni líka (já ég veit.... ég er svooo dugleg) og það verður sjálfsagt eitthvað skrautlegt.... að vísu er ég búin að búa hann nokkuð vel undir heimsóknina.. en samt... ég á ekki von á því að hann setjist í stólinn... hvað þá opni á sér munninn.  

En um þá heimsókn verður skrifað í næstu færslu... spennandi !!